Ittiiqaa Tafarii
Ittiiqaa Tafarii ( Afaan Ingiliish: Etika Teferi; 1986 dhalate) artistii Oromoo sirboota qabsoo baasun beekkamuudha. Ittiiqaan beekkamtii guddaa kan horate, sirba qeenxee saaqi saanqaa albamaa isaa duraan yoo ta'u, sirbootni isaa irra caalaatti Oromo protests irratti kan ijoo ta'aniidha.
Seenaa Ganamaa[gulaali | lakkaddaa gulaali]
Ittiiqaan bara 1989 Kaaba Itoophiyaa Naannoo Oromiyaa Salaale Aanaa Kuyyuu ganda qonnaan bulaa Hariiroo darsoo jedhamu abbaa isaa obbo Tafarii Boggaalaa fi Haadha isaa Aadde Shambii Bayyanaa irraa dhalate.
Ittiiqaan daa’imummaa isaa irraa eegalee sirba baay’ee waan jaalatuuf yeroo loon tiksaa sirbu namoonni ni dinqisiifatu. Umrii isaa barumsaaf geenyan bara 1998 Mana barumsa Laaftoo Gulantaa mana jireenyaa isaa irraa dhaqaa gala deemsa miilaa sa’aa sadii ol deemsisutti barumsa eegalee haga kutaa 5ffaa erga baratee booda gara magaalaa Garba gurraachaatti darbuun kutaa 6-12 barate. Barumsa isaa kutaa 10ffaa Osoo barachaa jiruu akka tasaa waan dhukkubsateef ji’oota jahaaf mana yaalaa biyyattii keessa jiran garaa garaa keessatti yaalli godhameefii dhibee isaa irraa dandamate. Akkuma dandamateen Albama Artistii Jaamboo Jootee Dafii koottu jedhu dhaggeeffachuun caalatti fedhii aartii horachuun weellisaa ta’uu akka qabu murteeffate.
Bara 2011 gara magaalaa Finfinnee imaluun qindeessaa muuziqaa Ibraahim Sa’id jedhamuun wal baruun hojii muuziqaa eegale. Albama isaa osoo hojjechaa jiruu magaalaa Finfinnee keessatti 2013 balaa tasa mudateen gamoon Hoteela tokkoo jiguun lubbuu namoota hedduu galaafatee fi namoota hedduu qaama hir’ise. Ittiiqaanis miidhamuun ji’oota hedduuf yaalamaa ture. Ittiiqaan balaa mudate kana irraa dandamachuun gara aartiitti deebi'uun sirboota isaa keessatti roorroo Mootummaan Wayyaanee Ummata isaa irraan gahaa jiru balaaleffachuun bara 2014 wallee jabana Roorroo jedhu uummata isaan gahuun fudhatama guddaa argate. Tikoota mootummaan doorsifamaa fi adamsamaa irra deddeebin sirboota warraaqsaa Didi Didi,Itti muddi jedhu gadi lakkisuun caalatti onnee Uummataa keessa gale.
Bara 2017 albama isaa jalqabaa mata duree Dura bahaa jedhuun uummata biraan gahuun hedduu fudhatama argatee albama cimaa bara 2019 jedhamuun badhaasa Oda Award fudhatee jira. Albama isaa keessaa Sirba Saaqi Saanqaa jedhu kan ilmaan Oromoo oromummaa isaaniif jecha hidhaa keessatti dararaman irratti xiyyeeffatu viidiyoon uummata biraan gaheera. Koonsartii biyya keessaa alatti kan qopheesse yoo ta’u Sagantaa gargaarsaa Buqqaatoota Somaalee shiraan qe’ee fi qabeenya isaanii irraa buqqa’an gargaaruf qophaa’e irratti guutuu Oromiyaa naanna’uun bilisaan koonsartiin muuziqaa qopheessee jira.
Ittiiqaan albama isaa 2ffaa hojjechaa osoo jiruu bara 2020 Vaayirasii Koronaan qabamuun yaala guyyoota 40 booda covid 19 irraa fayye. xumura bara 2020 wallee qeenxee Galma Dhugaa jedhu Viidiyoodhan uummataan kan gahe yoo ta’u yeroo ammaa albama isaa 2ffaa hojjechaa jira!
Sirboota[gulaali | lakkaddaa gulaali]
Albumoota[gulaali | lakkaddaa gulaali]
- Dura Bahaa