Shakiiraa

Shakira Isabel Mebarak Ripoll (Guraandhala 2, 1977) sirbituu, barreessituu sirbaa, shubbistuu, taatuu fi tola ooltuu lammii Kolombiyaati. Gumaacha isheen muuziqaa Laatiin fi pooppii ammayyaa keessatti gooteen baay'ee beekamtuudha, kanaanis "Mootittii Muuziqaa Laatiin" jedhamtee beekamti.

Seenaa Jireenyaa

Shaakiraan albaamii ishee Pies Descalzos (1995) jedhamuun beekamtii argatte, albaamiin kunis sirboota qeenxee "Estoy Aquí" fi "Pies Descalzos, Sueños Blancos" of keessaa qaba, kunis chaartiiwwan Laatiin Ameerikaa keessatti sadarkaa duraatti ishee geessise.^[1] Albaamiin Dónde Están los Ladrones? (1998) beekamtii isheen Laatiin Ameerikaa keessatti qabdu caalaatti cimse.^[2] Albaamiin ishee kan Afaan Ingiliizii jalqabaa Laundry Service (2001) sirba qeenxee "Whenever, Wherever" jedhu kan chaartiiwwan addunyaa hedduu irratti sadarkaa tokkoffaa irra ga'e, fi "Underneath Your Clothes" baase, kunis Shaakiraa aartistii Ameerikaa Kibbaa jalqabaa gabaa addunyaa keessatti milkoofte ishee taasise.^[3]

Albaamiin ishee kan dhiibbaa aadaa Ispeen qabu Fijación Oral, Vol. 1 (2005) fi albaamiin Afaan Ingiliizii Oral Fixation, Vol. 2 (2005) sirboota bebbeekamoo akka "La Tortura" fi "Hips Don't Lie" of keessaa qabu, sirbi kunis dubartii Ameerikaa Kibbaatiin sirba qeenxee jalqabaa chaartii Ameerikaa Billboard Hot 100 irratti sadarkaa tokkoffaa irra ga'eedha.^[4] Albaamiin She Wolf (2009) dhimmoota bilisummaa irratti kan xiyyeeffate fi dhiibbaa elektiroopooppii qabu yoo ta'u,^[5] Sale el Sol (2010) immoo jaalala isheen muuziqaa Laatiniif qabdu irraa kan madde fi sirba "Waka Waka (This Time for Africa)", sirba ofishiaalaa Waancaa Addunyaa 2010 of keessaa qaba.^[6]^[7]

Albaamiin Shakira (2014) fi El Dorado (2017) sirboota bebbeekamoo akka "La La La" fi "Chantaje" baasan. Albaamiin Las Mujeres Ya No Lloran (2024) muuxannoo dhiyoo kana wal-hiikuu fi fayyaa sammuu ilaalchisee isheen dabarsite irraa kan madde yoo ta'u, ergaa dubartoota humneessuu of keessaa qaba.^[8] Sana booda, Shaakiraan daawwannaa addunyaa Las Mujeres Ya No Lloran World Tour (2025–2026) jedhamu kan jalqabde yoo ta'u, dinqisiifannaa fi milkaa'ina gabaa guddaa argachuun doolaara miiliyoona 350 ol argamsiiseera.^[9]

Shaakiraan aartistoota muuziqaa addunyaa irratti gurgurtaa guddaa taasisan keessaa tokko yoo taatu, rekoordiiwwan miiliyoona 95 ol addunyaa guutuutti gurgurteetti.^[10]^[11] Yunaayitid Isteetisii fi addunyaa maratti sirboota qeenxee sadarkaa tokkoffaa irra ga'an hedduu, Badhaasa Giraamii (Grammy Awards) afur fi Badhaasa Giraamii Laatiin kudha shan qabdi.^[12]^[13] Shaakiraan tarree dubartoota muuziqaa keessatti galii guddaa argatan kan Forbes waggaa waggaan baasu keessatti hammatamteetti.^[14] Agarsiisni ishee bara 2020 Super Bowl walakkaa taphaarratti (Jennifer Lopez waliin) dhiheessite agarsiisota seenaa keessatti baay'ee daawwataman keessaa tokko dha.^[15] Muuziqaadhaan alatti, barnoota daa'immanii Kolombiyaa keessaatiif Fundación Pies Descalzos hundeessitee jirti,^[16] fiilmii Zootopia (2016) fi itti fufa isaa Zootopia 2 (2025) keessatti amala Gazelle jedhamuuf sagalee laatteetti,^[17] akkasumas sagantaa The Voice jedhamu irratti bara 2013 hanga 2014tti abbaa murtii ta'uun tajaajilteetti.^[18] Isheen miidiyaa hawaasaa irrattis namoota baay'ee hordofaman keessaa tokko yoo taatu, hordoftoota miiliyoona 90 ol qabdi.^[19]

Galmee Sirbootaa

Albaamota Istuudiyoo

Magia (1991)
Peligro (1993)
Pies Descalzos (1995)
Dónde Están los Ladrones? (1998)
Laundry Service (2001)
Fijación Oral, Vol. 1 (2005)
Oral Fixation, Vol. 2 (2005)
She Wolf (2009)
Sale el Sol (2010)
Shakira (2014)
El Dorado (2017)
Las Mujeres Ya No Lloran (2024)

Albaamota Kallattii

MTV Unplugged (2000)
Live & off the Record (2004)
Oral Fixation Tour (2007)
Live from Paris (2011)
Shakira in Concert: El Dorado World Tour (2019)
Anniversary: Oral Fixation (20th) and Pies Descalzos (30th) Live (2025)

Wabiiwwan

[1] “Pies descalzos” de Shakira cumplió 30 años: el disco que le abrió el camino por el mundo | TN

[2] '¿Dónde están los ladrones?', el éxito de Shakira que tiene una historia real en Bogotá

[3] Shakira Recalls Mammoth Crossover Moment as 'Laundry Service' Turns 20

[4] Shakira Insisted Label Add 'Hips Don't Lie' to Album

[5] 'Hips Don’t Lie' and 'Waka Waka': Top 10 Shakira pop songs that defined her global sound and chart dominance

[6] Shakira con su ‘Waka Waka’ destacó en exitoso concierto inaugural de ‘Sudáfrica 2010′ | Notas | BioBioChile

[7] Jazz news: Shakira Releases "Sale el Sol / The Sun Comes Out"

[8] La reconstrucción personal de Shakira en 'Las Mujeres Ya No Lloran', el álbum que marca su regreso

[9] Shakira Sets Record for Highest-Grossing Latin Tour of All Time

[10] Epson and Global Music Superstar Shakira Partner to Take Latin America by Storm | Epson US

[11] Shakira Is Billboard's First 'Latin Woman of the Year'

[12] Shakira | Artist | GRAMMY.com

[13] Shakira | Artist | LatinGRAMMY.com

[14] Shakira Mebarak

[15] J.Lo & Shakira Land Emmy Nods for Their Super Bowl Halftime Show & Other Nomination Highlights

[16] Shakira's New School Project: Changing Lives in Catatumbo -

[17] Shakira's 'Zoo' Song Gets Music Video Ahead Of 'Zootopia 2'

[18] Shakira to leave The Voice after just one season - Yahoo News UK

[19] Shakira, la reina de las redes sociales: 122 millones en Facebook y 94,1 millones en Instagram - Infobae

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]

[18]

[19]